இந்தியா, சேப்பாக்கத்தில் நடைபெறும் இந்தியா-இங்கிலாந்து கிரிக்கெட் அணிகளுக்கு இடையிலான முதலாவது டெஸ்ட் கிரிக்கெட் போட்டியில் இங்கிலாந்து அணியின் கேப்டன் ஜோ ரூட் பல்வேறு உலக சாதனைகள் படைத்து அசத்தியுள்ளார்.
நாணய சுழற்சியில் வெற்றிப்பெற்று துடுப்பாட்டத்தை தேர்வு செய்த இங்கிலாந்து அணி நிதானமாக விளையாடி ஓட்டங்களை குவித்தது.
தனது 100வது டெஸ்ட் போட்டியில் களமிறங்கிய ஜோ ரூட் அபாரமாக விளையாடி சதம் அடித்து அசத்தினார்.
முதல்நாள் ஆட்ட முடிவில் இங்கிலாந்து அணி 3 விக்கெட் இழப்பிற்கு 263 ஓட்டங்களை பெற்றிருந்து.
இரண்டாம் நாளான நேற்று தொடர்ந்து சிறப்பாக ஆடிய ஜோ ரூட் இரட்டைச் சதம் கடந்தார். இதன்மூலம் 100வது டெஸ்ட் போட்டியில் இரட்டை சதம் அடித்த முதல் வீரர் என்ற பெருமையை தனதாக்கி கொண்டதுடன் பல்வேறு உலக சாதனைகளை முறியடித்துள்ளார்.
சிக்சர் விளாசி இரட்டை சதம் அடித்த முதல் இங்கிலாந்து வீரர் என்ற சாதனையை படைத்துள்ளார்.
அத்துடன் 100வது டெஸ்ட் போட்டியில் அதிக ஓட்டங்களை எடுத்த இன்சமான் உல் ஹக்கின் உலக சாதனையையும் ஜோ ரூட் முறியடித்தார்.
இன்சமாம் உல் ஹக் 2005ம் ஆண்டு இந்தியாவுக்கு எதிரான டெஸ்ட் போட்டியில் 184 ஓட்டஙகளை பெற்றதே இதுவரை சாதனையாக இருந்தது.
இதேபோல் 100 டெஸ்ட் போட்டிகளில் அதிக ரன்கள் எடுத்த சச்சின் டெண்டுல்கரின் உலக சாதனையையும் ஜோ ரூட் முறியடித்துள்ளார்.
சச்சின் 100 போட்டிகளில் 8,405 ஓட்டங்களை எடுத்திருந்தார். ஜோ ரூட் 8,458 ஓட்டங்களை எடுத்துள்ளார்.
இப்போட்டியில் ஜோ ரூட் 218 ஓட்டங்களை குவித்த நிலையில், நதீம் பந்தில் எல்.பி.டபுள்யூ ஆனார்.